Nova sesión!

Hoxe tocounos un repasiño dos ósos!

Para iso, coñecemos a Paco, que sendo época de Samaín, non podía ser outro, que un esquelete (feito con roliños de papel).

Recordamos os ósos que xa coñecíamos e, unha voluntaria a que lle encanta escribir, fixo etiquetas para que non se nos esqueceran e colocámolas no sitio correcto; foi un pouco difícil, porque só viamos a Paco por diante...menudo lío para poñer a da columna vertebral! (e como disfruta a profe vendo como debatimos e chegamos a un acordo).

A Guillem, o protagonista da nosa historia encántalle a música clásica (recordemos nas anteriores sesións que bailamos ao son de Vivaldi e Korsakov) e a Paco, o noso esquelete, gústalle o Rock and Roll. Que mellor música para mover a nosa pelve! Así que nos voltamos un chisco "toliñas e toliños" e coñecimos a música de Elvis...véndoo bailar xa sabemos porqué lle chamaban "Elvis the Pelvis"! Pero non só movemos a pelve, fixámonos  nas partes do corpo que movemos, os ósos que lle corresponden e introducimos algúns máis: a tibia, o peroné, o cúbito, o radio, o esterno...etc...

Despois do baile, organizámonos nós sós en parellas. Só tiñamos 10 segundos para facelo! (traballamos a organización autónoma en un período de tempo determinado) Unha vez conseguido, observamos os ósos nas nosas parellas.

A profe tiña pensado outra cousa...pero como a nós o que nos gusta é bailar, pedímoslle outra canción de Elvis e se con ela podíamos xogar as cadeiras musicais, un clásico que nunca falla!

Chegamos ao acordo que xogaríamos pero obedecendo algunhas ordes: se a profe dicía unha parte do corpo, nós tiñamos que bailar só con ela e dicir en alto os ósos que correspondían. Pasámolo xenial!

-"Bailamos co brazo!!"

-"Úmero, cúbito e radioooo"

Ao rematar, que mellor que facer unha fila para marchar que montando unha conga. Ao mesmo tempo que repasamos as partes do corpo e os ósos que aprendemos durante a sesión, traballamos lateralidade, movemento, ritmo, organización e espazo ata o último momento!

Atentos e atentas á seguinte sesión! IMOS CONSEGUIR QUE PACO NOS FALE!

Seguimos!

Hoxe voltamos a escoitar a canción de Guillem...e saíu a pregunta esperada!
"Profe, Guillem existe de verdad?"
Buscamos información sobre el en internet e...claro que si! É unha historia real dun neno (Guillem Cabrera) que dende moi pequeno soñaba con ser bailarín. Vemos diferentes fotos del e vídeos nos que sae bailando.
Aproveitamos entón para facer unha sesión de psicomotricidade explorando o noso corpo e os seus límites. Tentamos imitar as súas posturas...que difícil!

Aproveitamos tamén para coñecer un pouquiño de música clásica e bailamos de puntillas, mantendo o equilibrio, máis rápido, máis lento, cun papel entre as pernas, na cabeza...etc. As obras que empregamos son "A primavera" de Vivaldi e "El vuelo del moscardón" de Rimsky Korsakov.

Seguimos explorando o noso corpo con diferentes xogos de coordinación.

E como as nosas clases de Psicomotricidade son en Inglés, facemos xogos que nos axudan a controlar o espazo aprendendo unha nova lingua.

Voltamos a calma nos nosos recunchos, esta vez de grafo motricidade, mentres un grupo traballa con Valentes, os demáis esperan o seu turno xogando coas letras de xeito autónomo e libre.

Comezamos!

Hoxe, as nenas e nenos da clase de 6º de Infantil, comezamos a traballar con "Valentes, un proxecto para a Igualdade".

"¿Que é ser Valente?"

Aquí tedes algunhas das respostas na aula:

-"Non terlle medo a nada"
-"Ser moi forte nos músculos"
- "...no corazón tamén!"
-"cando no patio defendemos aos da clase de tres anos"
-"Facer así cos brazos, como esas dúas nenas que saen no libro"

Despois dun longo "debate", falamos de porqué cren que son dúas nenas as que saen na portada.
"O pelo longo", "porque está con outra nena..."  Traballamos sobre iso poñendo diferentes exemplos e descubrimos que Ares, é un neno.
Unha vez analizada a portada, cada un se senta co seu libro, non sen antes facer fincapé no seu coidado e no xeito de manipulalo.

Sorpréndeme a actitude de curiosidade coa que pasan as follas, e identifican pequenas cousas que teñen gravadas na súa memoria de anos anteriores...Como mestre/a é tan gratificante saber que conseguimos deixar pegada nas súas cabeciñas...Velaquí algúns exemplos:

"O Buckingham Palace! onde vive a raíña de donde é Witchy the Witch!" (a marioneta que empregan na aula de inglés)

"Este traxe é do Entroido onde vive a mamá de Teacher! Un "marrón"!" (Cigarrón)

"Por aquí vivimos nós, e aquí Witchy the Witch!"

"O universoooo!!!"

Despois de mirar o libro, e de saber que imos investigar sobre persoas moi valentes, xuntámonos na Pizarra Dixital para escoitar a canción sobre Guillem, un neno que soñaba con ser bailarín; leo o código QR na Tableta e proxéctase na pizarra dixital. Bailamos e desfrutamos da canción....moi pegadiza! na seguinte escoitada xa se animaron a cantar!

Ao ser unha clase moi numerosa (25 nenos/as de 5 anos) e que demanda moita atención, dividimos o espazo en recunchos; mentres unha mesa traballa con Valentes, os demáis están no rincón de grafomotricidade, de arte, de creatividade, de construccións... Cando oigan o sonido da campá (xa coñecen esta forma de traballo), levantan as mans e rotan.
No recuncho de Valentes eles/as mesmos manexan a tableta para comprobar que o QR funciona no seu libro. Maxia!

Velaquí exemplos dalgúns recunchos da aula onde manipulan de forma libre e autónoma mentres agardan o turno para o recuncho Valentes.